מעשה ו ממלך עניו
מעשה ממלך עניו
רעדאַקטירןמַעֲשֶׂה אַמָאל אִיז גֶעוֶוען אַ מֶלֶךְ דֶער מֶלֶךְ הָאט גֶעהַאט אַ חָכָם. הָאט זִיךְ דֶער מֶלֶךְ אָנגֶערוּפְן צוּם חָכָם: בַּאֲשֶׁר סֶע פַארְהַאנְדְן אַ מֶלֶךְ, וָואס עֶר חַתְמֶעתּ זִיךְ, אַז עֶר אִיז אַ גְרוֹיסֶער גִבּוֹר אוּן אַן אִישׁ אֶמֶת אוּן אַן עָנָיו. (כְּלוֹמֶר אַן אֶמֶתֶער מֶענְטְשׁ אוּן הַאלְט פוּן זִיךְ נִישְׁט) אַ גִבּוֹר וֵויס אִיךְ, אַז עֶר אִיז אַ גְרוֹיסֶער גִבּוֹר, וָוארְן אַרוּם זַיין מְדִינָה גֵייט דֶער יַם. אוּן אוֹיף דֶעם יַם, שְׁטֵייט חַיִל אוֹיף שִׁיפְן מִיט הַארְמַאטְן[1] אוּן לָאזְן נִישְט צוּ טְרֶעטְן[2]. אוּן פוּן דֶעם יַם אִינֶעוֵויינִיק, אִיז פַארְהַאנְדְן אַ גְרוֹיסֶער זוּמְפּ אַרוּם דֶער מְדִינָה. וָואס סֶע אִיז דָארְטְן מֶער נִישְט דָא נָאר אַ קְלֵיין וֶועגְל. וָואס סֶע קָאן דָארְט נִישְט גֵיין נָאר אֵיין מֶענְטְשׁ, אוּן דָארְטְן שְׁטֵייעֶן אוֹיךְ הַארְמַאטְן. אוּן אַז אֵיינֶער קוּמְט מִלְחָמָה הַאלְטְן שִׁיסְט מֶען מִיט דִי הַארְמַאטְן. קָאן מֶען אַהִין נִישְט צוּ טְרֶעטְן. נָאר דָאס וָואס עֶר חַתְמֶעט זִיךְ אַז עֶר אִיז אַן אִישׁ אֶמֶת אוּן אַן עָנָיו. דָאס וֵוייס אִיךְ נִישְט. אוּן אִיךְ וִויל אַז דוּ זָאלְסְט מִיט בְּרֶענְגֶען דֶעם פָּארְטְרֶעט[3] פוּן דֶעם מֶלֶךְ. וָוארְן דֶער מֶלֶךְ הָאט גֶעהַאט אַלֶע פָּארְטְרֶעטְן פוּן אַלֶע מְלָכִים. אוּן דֶער פָּארְטְרֶעט פוּן דֶעם מֶלֶךְ (דְהַיינוּ וָואס עֶר הָאט זִיךְ אַזוֹי גֶעחַתְמֶעט כַּנַּ"ל) הָאט זִיךְ נִישְט גֶעפוּנֶען בַּיי קֵיין שׁוּם מֶלֶךְ. וָוארְן דֶער מֶלֶךְ אִיז פַארְבָּארְגְן פוּן מֶענְטְשֶׁן. וָוארְן עֶר זִיצְט אוּנְטֶער אַ פָארְהַאנְג. אוּן עֶר אִיז וַוייט פוּן דִי לַייט פוּן זַיין מְדִינָה.
אִיז דֶער חָכָם גֶעגַאנְגֶען אִין דֶער מְדִינָה אַרַיין. הָאט זִיךְ דֶער חָכָם מְיַישֵׁב גֶעוֶוען. עֶר בַּאדַארְף וִויסְן דֶעם מְהוּת פוּן דֶער מְדִינָה (כְּלוֹמֶר דִי זַאךְ פוּן דֶער מְדִינָה וִוי אַזוֹי דִי מְדִינָה פִירְט זִיךְ) אוּן דוּרְךְ וָואס קָאן עֶר וִויסְן דֶעם מְהוּת פוּן דֶער מְדִינָה? דוּרְךְ דִי קַאטָאוֶועס[4] פוּן דֶער מְדִינָה. וָוארְן אַז מֶען בַּאדַארְף וִויסְן אַ זַאךְ, מוּז מֶען וִויסְן דִי קַאטָאוֶועס פוּן דֶער זַאךְ. וָוארְן סֶע פַארְהַאנְדְן כַּמָה עֶרְלֵיי קַאטָאוֶועס. עֶס פַארְהַאנְדְן אֵיינֶער וִויל טַאקֶע יֶענֶעם טְרֶעפְן מִיט זַיינֶע רֵייד, אוּן אַז יֶענֶער קוּקְט זִיךְ אַרוּם, זָאגְט עֶר אִים אִיךְ טְרַייבּ קַאטָאוֶועס[5] אַזוֹי וִוי סֶע שְׁטֵייט אִין פָּסוּק כְּמִתְלַהְלֵהַּ הַיּוֹרֶה זִיקִים וְכוּ' וְאָמַר הֲלֹא מְצַחֵק אָנִי (כְּלוֹמֶר אַזוֹי וִוי אֵיינֶער שִׁיסְט פַיילְן אִין הַארְץ אַרַיין, אוּן עֶר זָאגְט אִיךְ טְרַייבּ קַאטָאוֶועס) אוּן אַזוֹי אִיז פַארְהַאנְדְן אֵיינֶער וָואס עֶר מֵיינְט טַאקֶע אוֹיף קַאטָאוֶועס, אוּן עֶר אִיז פָארְט מַזִיק דֶעם אַנְדֶערְן מִיט זַיינֶע רֵייד. אוּן אַזוֹי אִיז פַארְהַאנְדְן כַּמָה עֶרְלֵיי קַאטָאוֶועס. אוּן עֶס פַארְהַאנְדְן אִין אַלֶע מְדִינוֹת אֵיין מְדִינָה וָואס דִי מְדִינָה אִיז כּוֹלֵל אַלֶע מְדִינוֹת. (כְּלוֹמֶר דִי מְדִינָה אִיז דֶער עִיקָר אוּן דֶער כְּלַל פוּן אַלֶע מְדִינוֹת) אוּן אִין דֶער מְדִינָה אִיז פַארְהַאנְדְן אַ שְׁטָאט וָואס דִי שְׁטָאט אִיז כּוֹלֵל אַלֶע שְׁטֶעט פוּן גָאר דֶער מְדִינָה וָואס זִי אִיז כּוֹלֵל אַלֶע מְדִינוֹת. אוּן אִין דֶער שְׁטָאט אִיז פַארְהַאנְדְן אֵיין שְׁטוּבּ וָואס זִי אִיז כּוֹלֵל אַלֶע שְׁטִיבֶּער פוּן דֶער גַאנְצֶער שְׁטָאט וָואס דִי שְׁטָאט אִיז כּוֹלֵל וְכוּ' כנ"ל. אוּן דָארְט אִין דֶער שְׁטוּבּ אִיז פַארְהַאנְדְן אַ מֶענְטְשׁ וָואס עֶר אִיז כּוֹלֵל גָאר דִי שְׁטוּבּ, וָואס דִי שְׁטוּבּ אִיז כּוֹלֵל וְכוּ' כַּנַּ"ל. אוּן דָארְט אִיז פַארְהַאנְדְן אֵיינֶער וָואס עֶר מַאכְט גָאר דָאס לֵיצָנוּת אוּן דֶעם קַאטָאוֶועס פוּן דֶער גַאנְצֶער מְדִינָה.
הָאט דֶער חָכָם מִיט זִיךְ גֶענוּמֶען זֵייעֶר אַסַאךְ גֶעלְט. אוּן אִיז אַהִין גֶעגַאנְגֶען. הָאט עֶר גֶעזֶען אַז מֶען מַאכְט דָארְט כַּמָה עֶרְלֵיי גֶעשְׁפֶּעט אוּן קַאטָאוֶועס, האָט עֶר פַארְשְׁטַאנֶען אִין דִי קַאטָאוֶועס אַז דִי מְדִינָה אִיז דָאךְ פוּל מִיט שְׁקָרִים (דְהיינוּ לִיגְן) וָוארְן עֶר הָאט גֶעזֶען אַז מֶען מַאכְט גֶעשְׁפֶּעט. וִוי אַזוֹי מֶען נַארְט מֶענְטְשְׁן אִין מַשָׂא וּמַתָּן, אוּן וִוי אַזוֹי עֶר קוּמְט זִיךְ לָאדְן[6] אִין מַאגִיסְטְרַאט[7], אוּן דָארְט אִיז דוּרְךְ לִיגְן, אוּן זֵיי נֶעמֶען שׁוֹחַד. גֵייט עֶר צוּם הֶעכֶערְן סָאנְד[8], אוּן דָארְט אִיז אוֹיךְ גָאר לִיגְן. אוּן זֵיי הָאבְּן אַלְץ גֶעמַאכְט גֶעשְׁפֶּעט אוֹיף קַאטָאוֶועס. אָנְשְׁטֶעלְן[9] פוּן דִי אַלֶע זַאכְן. הָאט דֶער חָכָם פַארְשְׁטַאנֶען אִין דֶעם קַאטָאוֶועס אַז דִי מְדִינָה אִיז פוּל מִיט לִיגְן אוּן מִיט רַמָאוּת אוּן עֶס גָאר קֵיין שׁוּם אֶמֶת נִישְט אִין דֶער מְדִינָה. אִיז עֶר גֶעגַאנְגֶען אוּן הָאט גֶעהַאנְדְלְט אִין דֶער מְדִינָה. אוּן הָאט זִיךְ גֶעלָאזְט נַארְן אִין דֶעם מַשָׂא וּמַתָּן. אִיז עֶר גֶעגַאנְגֶען זִיךְ לָאדְן פַאר דִי סָאנְדֶעס. אוּן זֵיי זֶענֶען אַלֶע פוּל מִיט לִיגְן אוּן נֶעמֶען שׁוֹחַד. הַיינְט הָאט עֶר זֵיי גֶעגֶעבְּן שׁוֹחַד. מָארְגְן הָאבְּן זֵיי אִים נִישְט גֶעקֶענְט. אִיז עֶר גֶעגַאנְגֶען צוּ אַ הֶעכֶערֶן סָאנְד אוּן דָארְט אִיז אוֹיךְ פוּל מִיט לִיגְן. בִּיז עֶר אִיז גֶעקוּמֶען פַאר דֶעם סֶענַאט[10]. אוּן דָארְט אִיז אוֹיךְ דוּרְךְ לִיגְן אוּן שׁוֹחַד. בִּיז עֶר אִיז גֶעקוּמֶען צוּם מֶלֶךְ אַלֵיין.
אַז עֶר אִיז גֶעקוּמֶען צוּם מֶלֶךְ. הָאט עֶר זִיךְ אָנְגֶערוּפְן אוּן הָאט גֶעזָאגְט. אִיבֶּער וֶועמֶען בִּיסְטוּ אַ מֶלֶךְ. דִי מְדִינָה אִיז דָאךְ אִין גַאנְצְן פוּל מִיט לִיגְן דוּרְךְ. פוּן דֶעם אָנְהֵייבּ בִּיז אִין אוֹיסְלָאז[11]. אוּן סֶע אִיז אִין אִיר קֵיין שׁוּם אֶמֶת נִישְט דָא. אוּן הָאט אָנְגֶעהוֹיבְּן אוֹיסצוּדֶערְצֵיילְן[12] גָאר דָאס פַאלְשְׁקֵייט פוּן דֶער מְדִינָה. וִוי דֶער מֶלֶךְ הָאט גֶעהֶערְט זַיינֶע רֵייד. הָאט עֶר זִיךְ צוּגֶעבּוֹיגְן זַיינֶע אוֹיעֶרְן צוּם פָארְהַאנְג. עֶר זָאל הֶערְן זַיינֶע רֵייד. וָוארְן עֶס בַּיי דֶעם מֶלֶךְ אַ גְרוֹיס וואוּנְדֶער גֶעוֶוען אַז עֶס זָאל זִיךְ גֶעפִינֶען אַ מֶענְטְשׁ וָואס עֶר זָאל וִויסְן גָאר דָאס פַאלְטְשְׁקֵייט פוּן דֶער מְדִינָה. אוּן דִי שָׂרֵי מְלוּכָה הָאבְּן גֶעהֶערְט זַיינֶע רֵייד אוּן זֶענֶען אוֹיף אִים זֵייעֶר בְּרוֹגֶז גֶעוֶוען. אוּן עֶר דֶערְצְיילְט אַלְץ וַוייטֶער דִי פַאלְשְׁקֵייט פוּן דֶער מְדִינָה. הָאט זִיךְ דֶער חָכָם אָנְגֶערוּפְן. מֶען וָואלְט גֶעקֶענְט זָאגְן אַז דֶער מֶלֶךְ אִיז אוֹיךְ אַזוֹי וִוי זֵיי אַז עֶר הָאט לִיבּ לִיגְן אַזוֹי וִוי דִי מְדִינָה. נָאר אַדְרַבָּא פוּן דַאנֶען זֶעט מֶען וִוי אַזוֹי דוּ בִּיסְט אַן אִישׁ אֶמֶת אוּן דֶערִיבֶּער בִּיסְטוּ וַוייט פוּן זֵיי מַחְמַת דוּ קָאנְסְט נִישְט סוֹבֵל זַיין דֶעם שֶׁקֶר פוּן דֶער מְדִינָה. אוּן הָאט אָנְגֶעהוֹיבְּן דֶעם מֶלֶךְ זֵייעֶר זֵייעֶר צוּ לוֹיבְּן. אוּן דֶער מֶלֶךְ מַחְמַת עֶר אִיז גֶעוֶוען זֵייעֶר אַ גְרוֹיסֶער עָנָיו וּבִמְקוֹם גְדוּלָתוֹ שָׁם עַנְווּתְנוּתוֹ. וָוארְן אַזוֹי אִיז דֶער שְׁטֵייגֶער פוּן אַן עָנָיו. אַז וָואס מֶער מֶען לוֹיבְּט אִים אוּן מֶען גְעגְרֵייסְט[13] אִים. וֶוערְט עֶר אַלְץ קְלֶענֶער בַּיי זִיךְ אוּן מֶער עָנָיו אַלְץ. אוּן מַחְמַת דֶער חָכָם הָאט זֵייעֶר גֶעלוֹיבְּט אוּן גֶעגְרֵייסְט דֶעם מֶלֶךְ. אִיז דֶער מֶלֶךְ אַרַיינְגֶעקוּמֶען אִין גְרוֹיס עֲנָוָה אוּן אִין זֵייעֶר קְלֵיינְקֵייט אַרַיין. בִּיז עֶר אִיז גֶעוָוארְן גָאר נִישְׁט. הָאט עֶר זִיךְ נִישְׁט גֶעקָאנְט אַיינְהַאלְטְן אוּן הָאט אַ וָוארְף גֶעטָאן דֶעם פָארְהַאנְג עֶר זָאל זֶען דֶעם חָכָם. וֶוער אִיז דָאס וָואס עֶר וֵוייסְט אוּן פַארְשְׁטֵייט דָאס אַלְץ. אִיז אַנְטְפְּלֶעקְט גֶעוָוארְן דָאס פָּנִים פוּן דֶעם מֶלֶךְ. הָאט אִים דֶער חָכָם גֶעזֶען הָאט עֶר אָפְּגֶעמָאלְט זַיין פָּארְטְרֶעט. אוּן הָאט גֶעבְּרַאכְט צוּם מֶלֶךְ.
רמזי המעשה
רעדאַקטירןדַּרְכֵי צִיּוֹן אֲבֵלוֹת (אֵיכָה א). צִיּוֹן הִיא בְּחִינַת הַצִּיּוּנִים שֶׁל כָּל הַמְּדִינוֹת, שֶׁכֻּלָּם נִתְוַעֲדִים לְשָׁם. כְּמוֹ שֶׁכָּתוּב (יְחֶזְקֵאל לט): וְרָאָה אָדָם וּבָנָה אֶצְלוֹ צִיּוּן. וְזֶהוּ (יְשְׁעַיָּה לג): "חֲזֵה "צִיּוֹן "קִרְיַת "מוֹעֲדֵינוּ רָאשֵׁי-תֵּבוֹת מְ"צַ"חֵ"ק, שֶׁשָּׁם הָיוּ נִתְוַעֲדִים כָּל הַצִּיּוּנִים, וּמִי שֶׁהָיָה צָרִיךְ לֵידַע אִם לַעֲשׂוֹת הַדָּבָר אוֹ הַמַשָּׂא וּמַתָּן, הָיָה יוֹדֵעַ שָׁם. יְהִי רָצוֹן שֶׁיִבָּנֶה בִּמְהֵרָה בְּיָמֵינוּ אָמֵן. רְאֵה וְהָבֵן וְהַבֵּט אַתָּה, הַמְעַיֵּן, עַד הֵיכָן הַדְּבָרִים מַגִּיעִים. אַשְׁרֵי הַמְחַכֶּה וְיַגִּיעַ לֵידַע וּלְהַשִּׂיג מְעַט מִסּוֹדוֹת הַמַּעֲשִׂיּוֹת הַלָּלוּ, אֲשֶׁר לֹא נִשְׁמְעוּ כָּאֵלֶּה מִיָּמִים קַדְמוֹנִים. וְדַע שֶׁכָּל אֵלּוּ הַפְּסוּקִים וְהָרְמָזִים הַמּוּבָאִים אַחַר קְצָת הַמַּעֲשִׂיּוֹת הֵם רַק רְמָזִים וְגִלּוּי מִלְּתָא בְּעָלְמָא, לְמַעַן יֵדְעוּ כִּי לֹא דָּבָר רֵיק הוּא, חַס וְשָׁלוֹם, וְכַאֲשֶׁר נִשְׁמַע מִפִּיו הַקָּדוֹשׁ בְּפֵרוּשׁ שֶׁאָמַר שֶׁהוּא מְגַלֶּה אֵיזֶה רְמָזִים בְּעָלְמָא בְּאֵיזֶה פְּסוּקִים הַמְרַמְּזִים לְסוֹד הַמַּעֲשִׂיוֹת לְמַעַן דַּעַת שֶׁאֵינוֹ מְדַבֵּר חַס וְשָׁלוֹם דְּבָרִים בְּטֵלִים, אֲבָל סוֹד הַמַּעֲשִׂיּוֹת בְּעֶצֶם רָחוֹק מִדַּעְתֵּנוּ וְעָמֹק עָמֹק, מִי יִמְצָאֶנּוּ.
הערות שוליים
רעדאַקטירן- ↑ האַרמאַט = קאַנאָן = תותח.
- ↑ טרעטן = לדרוך, לרמוס. יותר מתאים לכתוב "איבערטרעטן" שפרושו: לחצות, לעבור, לדלג.
- ↑ פארטרעט = דיוקן, דמות של איש.
- ↑ קאַטאָוֶועס = תעלולים, ליצנות, קונדסות.
- ↑ קאטאוועס טרייבן = התלוצץ, התבדח. קאטאוועס-טרייבער = תעלולן, ליצן, בדחן.
- ↑ לאדן זיך = להתדיין.
- ↑ מאגיסטראט = עירייה.
- ↑ סאָנד = ערכאות.
- ↑ אנשטעל = העמדת פנים
- ↑ סענאט = סנט.
- ↑ אויסלאז = סיום, גמר, סוף.
- ↑ אויסדערציילן = ספר הרבה.
- ↑ גרייסן = שבח, רומם, הלל.